نصائح مهمة لعمل كيكة رأس السنة الجديدة

نصائح مهمة لعمل كيكة رأس السنة الجديدة

[ندعوك للتسجيل في المنتدى أو التعريف بنفسك لمعاينة هذه الصورة]
كل سنة وانتم طيبين
بمناسبة رأس السنة الجديدة وبما ان كل ست بيت بتحب تقدم الحلويات من صنع ايديها لأولادها هنتكلم النهارده مع بعض عن الحلويات، وإزاي نعمل الكيكة بطرق مختلفة ولذيذة…
بس أوقات كتير الكيكة بتطلع مش مظبوطة معانا، أو بتهبط مننا، ومابنكونش عارفين إيه السبب مع إننا عملنا كل حاجة مظبوطة…

علشان كده قبل ما ندخل المطبخ، تعالوا الأوّل نعرف مع بعض إيه الأسباب اللي بتخلّي الكيكة تطلع مش مظبوطة معانا…
أوّل حاجة… إن درجة حرارة الفرن مابتكونش مظبوطة أوي؛ يعني إما إنها تكون أعلى من اللازم، وده بيخلّي الكيكة تهبط، أو إن الحرارة تكون قليّلة أوي، وده بيخلّي الكيكة تطلع مكتومة وناشفة، علشان كده لازم تلتزمي بدرجة الحرارة اللي مكتوبة على الوصفة، ولازم كمان تفتحي الفرن قبل ما تبدئي في عمل الكيكة؛ علشان يلحق يسخن قبل ما تدخليها فيه.
تاني حاجة… إنك تستخدمي كمية دقيق أقل أو أكتر من اللي مكتوبة في الوصفة اللي بتعمليها؛ لأن أهم حاجة في الكيكة إن المقادير اللي فيها تكون مظبوطة جداً، علشان تطلع معاكِ كويسة.
تالت حاجة.. إنك تفتحي الفرن كل شوية على الكيكة، لإن ده بيخلي الكيكة ماتعلاش في الفرن.
وعلشان تتجنّبي المشاكل دي، وتحصلى على كيكة مرتفعة، اتّبعي الخطوات دي:
1- افصلي البياض عن الصفار، واضربي البياض لوحده لحد مايكون زي الكريمة.
2- اضربي البيض مع السكر لمدة خمس دقائق على الأقل.
3- صبّي العجينة في الصينية على مرة واحدة.
4- بعد ما تخلّصي العجن، سيبي الخليط لمدة 10 دقائق على جنب، ولو لقيتيه غيّر شكله اضربيه تاني.
5- يُفضل إنك تدخلي قالب الكيك في الرف المتوسّط من الفرن.

شكرا على هذه النصائح المهمة التي تحتاجها كل واحدة منا

تقبلي مروري